Емил Зафировски

„Корона интернационал“, фирмата на која Министерството за финансии и додели лиценца за казино, е капитално поврзана со фирмата „Југосвен“, која должи 13 милиони евра неплатен данок. Ова го пишува во поседовниот лист заведен во гевгелискиот катастар во март 2007 година, во кој „Корона интернационал“ се јавува како доверител во „Југосвен“ и има побарување од еден милион евра. Три месеци подоцна, спротивно на законот, Владата, по предлог на Министерството за финансии, на „Корона интернационал“ и додели лиценца за приредување игри на среќа. Законот вели дека не смее да и се издаде лиценца за казино на фирма што е капитално поврзана со друга фирма што и должи данок на државата. Во Министерството за финансии вчера не сакаа да коментираат и рекоа дека одговорноста за случајот ја има УЈП. Пред три месеци во истото министерство изјавија дека ја проверувале капиталната поврзаност и дека доколку ја утврдат ќе имало санкции и одземање на лиценцата. Долгот од 13 милиони евра е направен по основа на прикривање добивка од 17,9 милиони евра. Основицата е пет милиони евра, а осум милиони евра се доспеани камати поради неплаќање. Даночното затајување го потврди УЈП, која минатата недела распиша оглас за лицитација на имот на „Југосвен“ вреден 13 милиони евра. Пет дена потоа огласот беше повлечен поради постоење на судска забрана за отуѓување на имотот. Горан Трајковски, директорот на УЈП, го отпушти од работа Љупчо Колев, директорот на струмичката УЈП, затоа што распишал лицитација што не може да се реализира поради судската забрана за отуѓување на имотот. Уште две службенички од Струмица се суспендирани од работа и против нив е поведена дисциплинска постапка. УЈП се сомнева дека тројцата намерно направиле законски пропусти и распишале лицитација за да оневозможат да се реализира продажбата на имотот на казиното. Случајот со гевгелиското казино „Југо“ е најголемото досега откриено затајување данок. Случајот беше откриен во 2003 година, кога двајцата сопственици на казиното, Швеѓанецот Ларс Клинк и Србинот Драган Стошиќ, беа уапсени на граничниот премин Богородица во обид нелегално да изнесат од државата 175.000 евра. По нивното апсење следуваше акција на полицијата во домот на Стошиќ, при што беше запленета обемна документација. Документацијата и беше доставена на увид на УЈП, која утврди дека сопствениците на казиното воделе паралелно книговодство, односно дека реалните добивки ги прикажувале како загуби за да го избегнат данокот на добивка. И покрај доказите од УЈП, двајцата сопственици минаа неказнето. Гевгелиското обвинителство го ослободи Ларс Клинк уште во истражната постапка. Драган Стошиќ доби ослободителна пресуда од велешкиот суд и беше прогласен за невин по основа на обвинението дека затајувал данок.