Околу 6,6 отсто од вкупниот број анкетирани ученици во гимназијата „Цветан Димов“ во скопската населба Топанско Поле одговориле дека носат оружје на училиште, во анкетата што ја спровеле УНДП и невладината организација „Разбуди се“. Резултатите од анкетата вчера беа презентирани во ова училиште за да се види колкава е безбедноста во училиштето. Анкетата во која биле опфатени 700 ученици од вкупно 1.650, колку што има во ова училиште, е дел од проектот „Насилство меѓу учениците“. Најголем дел анкетирани одговориле дека еднаш неделно се сведоци на насилство, а десет отсто одговориле дека биле изложени на опасност и насилство во училишниот двор. Според дадените одговори, насилство и тепачки најчесто се случувале поради одбрана на девојка. Од невладината „Разбуди се“ вчера најавија дека ќе изработат прирачник, кој ќе содржи механизми и начини за спречување на насилството помеѓу младите.

А. П.