Тендерот за превоз на ученици и наставници во општината Долнени е наместен, тврдат неколку приватни превозници. Иако распишан уште од јули, тендерот неколку пати се поништува.
Приватниците што вршат превоз велат дека со учеството на тендерот, кој е нерегуларен, им се прави штета и парите им пропаѓаат.
Од локалната самоуправа велат дека тендерската процедура се спроведува правилно. Бирото за јавни набавки при Министерството за финансии побара да се изврши инспекциски надзор врз спроведувањето на постапката за отворен повик за превоз на ученици и наставници спроведен од општина Долнени.
- На тендерот што беше распишан лани во јуни освоив максимум 100 бода. Тендерот го доби понудувач што беше рангиран со 70 бода, што значи тендерот беше наместен и веројатно решен со поткуп. Комисијата правилно изврши бодување, но градоначалникот не го потпиша изборот. Со учеството на лажираниот тендер изгубив околу 500 илјади денари. Повторно нема да конкурирам и по цена да изгубам пари и работа оти исходот и на вториот тендер ќе биде ист - вели Урим Ибески од ДООЕЛ „Линди Турс“ од село Дебреште.
Пет заинтересирани фирми од Дебреште, Црнилиште, Лажани, Борино и Прилеп, кои конкурирале на тендерот, се незадоволни од исходот и поднеле жалба до комисијата за жалби по јавни набавки при Владата на Македонија. Оваа комисија констатирала дека објавата на повикот не содржела назнака за деливост на предметот на набавката по линии и исто така доставените понуди не биле подготвени согласно со барањата на тендерот. Тендерот бил поништен, а општината Долнени распишала нов тендер.
- Вториот тендер е објавен на 20 февруари, ќе трае до 20 април и важи една година. Постапката за отворен повик ќе се спроведува законски - вели Зоран Здравески, претседател на комисијата за јавни набавки при општина Долнени.
По реакцијата на незадоволните автопревозници, Бирото за јавни набавки при Министерството за финансии од централната внатрешна контрола побара да изврши инспекциски надзор врз спроведувањето на постапката по отворениот повик за превоз на ученици и наставници од местото на живеење до училиштето во општината Долнени.

Св.Р.