Министерот за здравство Имер Селмани тврди дека при подготовката на основниот пакет здравствени услуги, кој ќе важи од 1 јануари, биле консултирани и претставници на пензионерите и на потрошувачите. Предлогот за основниот пакет услуги вчера бил доставен до министерот, а треба да го усвои и Владата. - Во управниот одбор на Фондот за здравство има претставник на пензионерите и на потрошувачите, а сите одлуки се транспарентни и со провајдерите и со корисниците. Ќе ја разгледам верзијата што ќе ми биде оставена и ќе направам одредени консултации за да бидам сигурен дека сме направиле добар основен пакет прифатлив за граѓаните, Фондот и лекарите - вели Селмани. Во пакетот се ограничуваат бесплатните услуги што може да ги добијат здравствено осигурените граѓани. Пакетот предвидува, на пример, здравствените услуги да се ограничат на една лабораториска анализа годишно, едно снимање на апарат за компјутерска томографија или на магнетна резонанца. За повеќе услуги виза ќе дава исклучиво лекарот. Основниот пакет треба да биде усвоен до крајот на годината.

Н. Н. Б.