Прилепските тутунопроизводители не се задоволни од просечната откупна цена на тутунот. Од државата очекуваат најмалку 40 денари премија за килограм тутун. Доцни исплатата на преземениот тутун, а тутунските експерти советуваат да садат басмаски сорти тутун, приспособени на европските барања.
Прилепските тутунари велат дека почвата е подобна само за ориенталски типови тутун.
- Кај нас почвата е таква што само ориентален тутун успева на надморска височина од 600 метри. Производителот со басмак нема можност да постигне производство во поголемо количество. Земјата е таква, хидросистем нема - вели Јонус Садикоски, тутунар од Црнилиште.
Откупот на тутунот во прилепско речиси заврши. Повеќе од 6 илјади тутунопроизводители веќе предадоа најголем дел од тутунот на откупувачите.
- Просечната откупна цена од околу 120 денари е незадоволителна и пониска од лани. Доцни и исплатата на тутунот. Очекуваме премија од најмалку 40 денари по килограм. Ќе побараме од Министерството за земјоделство вторпат да му ја одземе лиценцата на „Струмица табак“ и исплатата на тутунот да се води многу посериозно. И Тутунскиот комбинат од Прилеп доцни со исплатата и очекуваме да се најде решение и начин да се доисплати тутунот - вели Перо Стојкоски, претседател на регионалниот сојуз на земјоделците „Клас“.
Викендов на прилепските тутунопроизводители им беа презентирани вештачки ѓубрива од Грција погодни за тутун.
- Најдобар избор може да направи самиот тутунопроизводители и затоа сме сигурни дека зад нас имаме околу 90 отсто грчки тутунопроизводители. Аналогно на грчките тутунопроизводители што се задоволни и тука може да се постигне истиот резултат со овие ѓубрива. Нашата фабрика произведува само хемиски комбинирани комплетни ѓубрива. Секое зрно ѓубриво ги содржи сите елементи - азот, фосфор и калиум - вели Панајот Скарапиперис, генерален директор на „Агроефодија“, со седиште во Атина и претставништво во Струмица.

Св.Р.