Екипа на Музејот на Македонија од денеска го продолжува истражувањето на Римскиот форум на античкиот локалитет Стоби.
За време на двете истражувачки фази - првата во периодот мај/јуни, а втората во август/октомври - ќе се работи на внатрешноста на градбата.
Форумот е изграден во 2 век и активно функционирал и во 3 век. Со минатогодишните истражувања се констатирани и два нови објекта што биле во негова функција.
Од Музејот најавуваат дека во овие истражувања ќе се почне да се работи и на просторот источно од внатрешниот градски бедем, каде што со поранешните ископувања е откриена голема просторија со перистил и подни мозаици.
Истражувањата ги раководи Мила Шурбановска, а во втората фаза на истражувањето на Стоби ќе бидат вклучени и експерти за мозаици и архитектонска декоративна пластика од Италија и од Палестина, кои заедно со македонската екипа ќе работат на подготовките за реконструкција, конзервација и презентација на целиот објект.
Годинашните истражувања ги финансира невладина организација од Палермо, Италија, во рамките на проектот „Археолошка и туристичка валоризација на археолошкиот град Стоби“.