Кристофер Делисо и е познат на македонската јавност најмногу како патописец и новинар фриленсер, кој со своите дела инспирирани од Балканот, особено со книгата „Скриена Македонија“, има големи заслуги за промоција на Македонија како туристичка дестинација. Помалку е познато дека тој е историчар и искусен политички аналитичар, кој како директор на интернет-порталот „Балкански анализи“ одблиску и внимателно ги следи случувањата во регионот. Со него разговараме за прогласената независност на Косово и можните последици врз Македонија. уПретстојните месеци се исклучително важни за Балканот. Каков расплет очекувате? - Не сум сигурен дека луѓето овде се свесни дека живеат во исклучително важен историски период и дека настаните што сега се случуваат ќе имаат огромно влијание врз иднината. Не знам дали и странските дипломати имаат чувство за одлуките што ги носат. Веројатно на Косово, откако стана независно, Албанците ќе почнат да се борат меѓу себе за превласт. Долго време сите албански политичари имаа една платформа - да им ветуваат на луѓето дека Косово ќе стане независно. Сега, откако тоа се случи, тие ќе мора да зборуваат за економските проблеми, за социјалните проблеми. Мислам дека тогаш ќе се свртат еден против други. Таму веќе нема доволно Срби за да предизвикаат нови насилства, но доколку албанските партии се спротивстават на религиозна основа, тогаш тоа може да предизвика некаква дестабилизација. уКакви импликации тоа ќе има врз Македонија? - Не знам дали тоа би се рефлектирало и врз Македонија. Македонците се изјаснија дека ќе се согласат со независноста на Косово. Тогаш би имале ситуација кога Србите би ги прекинале дипломатските односи со секоја земја што ќе ја признае косовската независност. Ако одлучат тоа да го сторат со нивните најблиски соседи, како што е Македонија, тогаш мислам дека тоа би било полошо за Србија, а луѓето би биле повеќе наклонети кон Македонија. уКако Македонија да гради добри односи со Приштина, а да не го налути Белград? - Тоа е многу тешко. Дипломатите овде се обидуваат да направат нешто, да ја прикажат ситуацијата онаква каква што е, дека Македонија, во основа, треба да го направи она што и го налагаат САД и ЕУ. Мислам дека Србите се премногу емотивни и дека не можат да ја сфатат ситуацијата, дека Македонија мора да го прави она што и е кажано, затоа што е мала земја. Но, како што реков, луѓето во целиот свет треба да бидат свесни зошто се следат политиките на САД и на ЕУ. Треба, исто така, да се потсети и на ситуацијата во 1999 година, кога Македонија прифати 400.000 косовски бегалци, да се нагласи аспектот на човековите права, создавањето мултиетничка држава. Мислам дека на Македонија ќе и треба уште поголема меѓународна поддршка. уДали решавањето на косовскиот проблем ќе значи и конечно затворање на Балканот како светска тема? - За мене ова е прашање на суета на моќните меѓународни фактори. Тие веруваат дека знаат се. Доколку ја читате историјата, ќе видите дека за секое прашање западните дипломати велат дека тоа е конечно решение, сега ќе има мир. Токму поради нив, а не поради луѓето што живеат овде, тоа никогаш не се случило, бидејќи секогаш се појавува некој помоќен фактор кој му се спротивставува на другиот. Во случајов, тоа се САД, Русија, ЕУ. Тоа се страни што застапуваат различни интереси, така што, многу сум сигурен дека косовската криза ќе се реши, но не мислам дека ќе има трајно решение. На Балканот ништо не е статично. Сите решенија се краткорочни - за пет или десет години. Изминатите 150 години многу пати се променија границите, се се менува на секои триесетина години. Не мислам дека ова е крај на балканското прашање, а луѓето не би требало ни да го очекуваат тоа.